Geym-cem bitti

(українською вище / ukrayince yuqarıda)

«Sergüzeşt Saifesi» bitti! İştirak etken, oyunlarnı oynağan, teşkilatlandıruvda yardım etken, malümat daratqan ve bizni em de iştirakçilerni desteklegen er keske yürekten teşekkür bildiremiz! Oyunlarnıñ, iştirakçilerniñ ve müsbet teessuratlarnıñ sayısı tahminlerimizden ziyade oldı!

Biz ilk sefer boyle olğan adiseni teşkil ettik, şunıñ içün evelden köz ögüne alınıp bilingen meselelerniñ bir qısmını diqqatqa almadıq. Teşkilatlandıruvda olğan eksiklikler içün afu etemiz. Añlavıñız, desteğiñiz ve mesleatlarıñız içün sağ oluñız!

Oyunlar ve mukâfatlar (prizler)

Birinci yerini Eugene Mokeiev müellifinden «Do svitla zirok» («Yıldız yarığına doğru») oyunı qazandı. Bu, planetanıñ terenliginde yaşağan tsivilizatsiya aqqında oyundır. Üstte yaşamaq imkânsız, çünki anda aqıllı canlarnı avlağan sırlı «obskurlar» bar. Lâkin siz planetanıñ üstündeki sırlarnı çezmege ve yıldız yarığını körmege ümüt etesiñiz. Oyun mantıqlılıqları «Carved from Brindlewood» sistemasına yaqın, amma iştirakçiler nevbetnen em tedqiqatçılar, em de obskurlar içün oynaylar. Bu oyunıñ müellifi 100€ miqdarında mukâfat aldı.

Ekinci yerini gm_railroader müellifinden «Reykovod» («Rels yetekçisi») oyunı qazandı. Bu, masa üstü rol oyunınıñ alıp barıcısı aqqında oyundır. O, özü evelden planlaştırğan süjetini oyuncılarnıñ manasız areketlerinden qurtarmağa ve onı keri planlaştırılğan «relselrge» qaytarmağa tırışa. Bu oyun azır bir süjetniñ dayanıklıqlığını teşkerüv içün de qullanıla bile. Bu oyun içün müellif 50€ miqdarında mukâfat aldı.

Üçünci yer Sergiy "techniX" Mojayskıy müellifinden «İnşi kartı...» («Diger kartlar veya Arhipelagnıñ uzaq adalarına etilgen ekspeditsiyanıñ kerçek tasviri...») oyunına qaldı. Bu, gemide yürüv ve bu sefere bağlı tüşünceler aqqında oyundır. Mantıqlılıqlar kart destesine esaslana. Bu oyun geym-cem teşkilâtçılarından biri olğan techniX tarafından yaratıldı, şunıñ içün o mukâfatqa iddia etmey. 20€ miqdarındaki mukâfat qazanılğan bal bağlılığına köre nevbetteki oyunğa keçirile.

Dörtünci yer eki oyunğa qaldı: «Veresova Truna» ve «Plivka dlya Teatro Grottesco».

Jabberwocky müellifinden «Veresova Truna» («Süpürge otu Tabutu») — «Fables» komikslerinden ilhamlanğan detektiv oyunı. Siziñ qaramanıñız qatilliklerni araştıra, lâkin özü de qaranlıq tarafını gizli tuta. Oyun «Carved from Brindlewood» sisteması ve «Blackjack» kart oyunınıñ mantıqlılıqlarını birleştire: çekilgen kartlar izlerni tayin ete, olarınıñ cemisi ise qaraman qatilni taptımı-yoqmı degen sualge cevap bere. Bu oyunıñ müellifi 20€ miqdarında mukâfat aldı.

Dense Forest Camp taqımından «Plivka dlya Teatro Grottesco» («Teatro Grottesco içün şeritçik») — acayip kino aqqında oyun. Bu oyunıñ qaramanı öz tercimeialı kinonıñ şeritçigini montaj ete, siz ise onı kadr-kadr tasvir etesiñiz. Oyun qısqa ve sıq tasvirlerni «çengel-sözler» vastasınen birleştirip, ikâye qurmağa teşviq ete. Bu oyunnı Deep Forest Camp yarattı, olar özleri mukâfat fondu içün para ayırdılar, şunın içün olar mukâfatqa iddia etmeyler.

Mayıs 11 vaqtı ile bütün mukâfatlar ğaliplerge yollanıldı.

Deep Forest Camp taqımından Illair birinci yerler içün böyle güzel medal-resimlerini sızdı: 1-inci yer, 2-nci yer, 3-ünci yer. Eğer olar begenseñiz, oyunıñıznıñ saifesinde yerleştire bilersiñiz — biz bundan memün olurmız!

Şübesiz, diger oyunlar da pek meraqlı ve diqqatıñızğa lâyıqtır. Eğer evelce baqmağan olsañız, sizi geym-cemde yaratılğan bütün oyunlarnı körmege çağıramız:

• Fishkiller müellifinden «Bojı Znakı» («Tañrı İşaretleri») — bu oyunda qaraman hayallı mezarlıqta keze, Tañrı işaretlerini tefsir ete ve bu dünyada qalıp ketken ruhlarğa cennetke tüşmege yardım ete. Oyunda tek metin yazmaq degil, mezar taşlarınıñ resmini sızmaq da teklif etile.
• Fungaloid Bastards müellifinden «Eons From Home» — bu oyunda insanlar yaşayabilecegi planetalarnı qıdırğan yıldız gemisiniñ bort bilgisayarı rolüni oynamağa teklif etile. Oyun adetteki ayat devamında taymer vastasınen oynala: muayyen vaqıtta etrafıñızdaki eşyalarnı közden keçirmek ve olar qaysı kosmos obyektlerine oşağanını tasavvur etmek kerek.
• Vallrough müellifinden «Magiçna peçera» («Sırlı qoba») — bu oyunda qaraman lânetlengen sırlı qobadan çıquv yolunı qıdıra ve goblinlerge qarşı cenkleşe. Oyun damalı harita üzerinde oynala.
• tenori-nori müellifinden «Mayakı sliv» («Sözler mayakları») — bir qaç esas sözge esaslanıp ikâye yazuv oyunıdır. Qaramanlar — ziyafetçiler (piligrimler), sözler ise olarnıñ qayda ketkenini köstere. Mantıqlılıqlar altı taraflı oyun kubiklerge esaslana.
• Vallrough müellifinden «Mimikratsiya» — canavarnıñ insan qıyafetine kirip, yeraltı türmeden qaçmağa tırışqanı aqqında oyun.
• Jabberwocky müellifinden «Mono no aware» — insanın ömürini hokku vastasınen tasvir etmege teklif etken oyun. Kubikler atılması hokku içün fikir bergen mevsimlik sözlerni saylamağa yardım ete. Ayat vaqialarını doğrudan-doğru degil de, tabiat timsalleri arasında gizlep, olarğa işaret eterek tasvir etmek teklif etile.
• Kichiro Nori müellifinden «Petelna veja» («İlmekli qulle») — rogue-like üslübindeki oyun. Oyun dev qullede duşmanlarnen cenkleşmekten ve mümkün qadar uzaqqa barmaqtan ibaret. Ğalebe qazanmaq imkânsız — esas mesele qaraman qaç vaqıt dayanabilecegindedir. Settıng umumiy çizgiler ile tasvir etilgen, lâkin o daa ziyade ilmiy-fantastikağa oşay.
• Tengro müellifinden «Poperedni doslidjennya vımerlıh Hoȕmänš» («Nesli kesilgen Hoȕmänšlarnıñ evelki tedqiqatları») — insan tsivilizatsiyasını, onıñ viranelerini ögrengen ecnebiy közümen tasvir etmege teklif etken oyun. Tasvir içün Google Maps haritasındaki (veya kerçek ayattaki) asıl obyektlerni almaq mümkün, lâkin ecnebiy dünyanı başqa türlü körgenleri içün bu tasvirler yañlış olacaq. Mantıqlılıqlar kart destesi ve altı taraflı oyun kubiklerine esaslana.
• Eugene Mokeiev müellifinden «Providnık Zagublenıh» («Ğayıp olğanlarnıñ yolbaşçısı») — Boz Çölünde ğayıp olğan ruhlarnen laf etken ve olarnıñ o dünyâğa ketmesine mania olğan meselelerni çezmege tırışqan bir derviş aqqında oyun. Oyun içün Taro kartları ve altı taraflı oyun kubik qullanıla.
• Dadmha müellifinden «Sonyaçnıy Klerk Sanço» («Küneş kâtibi Sanço») — küneş kâtibi Sançoğa Küneşni kökke çıqarmağa yardım etmek kerek olğan oyun. Oyun yedi kün devam ete ve insanlarnı gacetlerden daa az qullanmağa teşviq ete. Oyun içün telefonda ekran vaqtını esaplağan programmanı qurmaq teklif etile. Qaramanıñıznıñ muvaffaqiyeti sizin öz ekran vaqtıñıznı ne qadar sıñırlaycağıñızğa bağlıdır.
• DimaZhurba müellifinden «Sou de Salvador (Men Salvadordandım)» — Brazil medeniyetinden ilhamlanğan oyun. Qaramanıñız — kapoeyra doğğan şeer Salvadorğa tüşken bir deñizcidir. Şeer tehlikelernen toludır, lâkin qaramanıñız özü de kapoeyranı bile ve yerli ahalige öz maharetini köstere bile.
• HronoStranger müellifinden «Strilets» («Atıcı») — uruşlarğa esaslanğan oyun. Kart destesinden çıqqan kartlar duşmanlarnı ve qaraman olarnı uracaq oqlarnı tayin ete. Qaideler çeşit senariyler yaratmağa imkân bere, oyunğa ise cadı avı senariysi de qoşulğan.
• First Floor TTRPG müellifinden «Treş Goblin» («Çöpçü Goblin») — bu oyunda ayatıñızdaki lüzumsız eşyalarnı goblin hazineleri kibi tasvir etmek teklif etile. Meselâ, oquğanıñızdan daa çoq kitap satın alsañız, goblin dünyasında olar sırlı cadı grimuarları ola bile.
• Dmıtro Kuşnaröv müellifinden «Vıriy» — Yunan mifologiyasınıñ süjetini Ukrayina ve Belarus dekoratsiyaları ile birleştirgen oyun. Qaramanıñız ruhnı canlar dünyasına keri ketirmek içün Vıriyge — ölüler padişahlığına — yollana.

Bundan da ğayrı, Konstantin Taro cem devamında özüniñ bir çoq oyunını derç etti. O, bu oyunlarnı saylavğa qoymamağa qarar berdi, lâkin olar da diqqatıñızğa lâyıqtır: «Skandalnıy kadr» («Skandal kadr») — paparatsiler aqqında, «Kosmiçne taksi jahiv» («Deşetli kosmos taksisi») — ecnebiy-nelegal muarcirlerni taşığan qaçaqçılar aqqında, «Hrono-odisseya» — vaqıt boyunca seyaat aqqında, «Krov na kameni» («Taş üzerindeki qan») — qale mudafaası aqqında, «Kobzar-lyutnık» — yırlarnı tertip etüv aqqında, «Tsina odnogo jittya» («Bir ömürniñ fiyatı») — natsist kontslagerindeki ayat aqqında, «Hroniki Beyker strit» («Beyker strit yılnameleri») — Şerlok Holms aqqında, «Kolektsiya» («Toplam») — nadir böcek ve köbeleklerni qıdıruv aqqında, «Ostanniy marş Gonsalesa» («Gonsalesniñ soñki marşı») — konkistadorlar aqqında, «Zabutıy rıtual» («Unutılğan ayin») — Lavkraft mifleri aqqında, «Pisok ta pam’yat» («Qum ve hatıra») — öz tılsımı ile arheologlarğa qarşı turğan mumiya aqqında.

Teşekkürler

Bu geym-cem ancaq onı desteklegen insanlar sayesinde muvaffaqiyetli keçti. İştirak etken ve öz yaratıcılığı ile biznen bölüşken er keske teşekkür bildiremiz. Siz ğayet meraqlı ve istidatlısıñız! Çeşit-türlü oyunlarıñız içün sağ oluñız. Hobbimizni zenginleştirgeniñiz içün teşekkürler!

Oyunlarnı oynap, fikirlerini bildirgenlerge de teşekkür etemiz! Tamam keri bağlantı müelliflerni oyunlarını yahşılaştırmağa ve yañılarını yaratmağa ilhamlandıra. Diqqatlı ve faydalı şerhleriñiz içün sağ oluñız!

Dense Forest Camp MRO neşriyatına (dfcgames.com) teşekkür etemiz! Olar mukâfat fondunı arttırdılar, teşkilâtta yardım ettiler, öz Telegram kanallarında ve podkastlarında geym-cemimiz aqqında haber berdiler ve medallerni sızdılar. Geym-cem içün ise «Plivka dlya Teatro Grottesco» («Teatro Grottesco içün şeritçik») oyunını yarattılar.

Andriy "Fishkiller" Gusarovğa teşekkür bildiremiz! O, «Temnobaştove Boloto» («Qara qulle batlaqlığı», @ttrpgswamp) Telegram kanalında ve «d100 novın» video-daycestinde cemimiz aqqında haber paylaştı. Bunen beraber, teşkiliy meselelerini muzakere etmege yardım etti ve geym-cem içün «Boji Znakı» («Tañrı İşaretleri») oyunını azırladı.

İNRİUM (Ukrayin Tilinde Masaüstü Rol Oyunları Teşebbüsi, inrium.org.ua) toplulığına teşekkür etemiz! Olar tek cem aqqında malümatnı özlerinde yerleştirmege izin bermeknen qalmayıp, öz haberlerinde de cemimizni añdılar.

«RolePlay Solov’yinoyu» (Telegram-da @RoleplaySolovinoiu, Instagram-da @roleplay_solovinoiu) toplulığına geym-cem aqqında malümatnı yerleştirmege izin bergenleri içün teşekkür etemiz.

Lingvo Team (lingvoteam.com, Instagram-da @lingvoteam_bp) tercime bürosına qırımtatarca tercimeler içün teşekkür bildiremiz. Doğrusını aytqanda, biz olarnı biraz bozduq: metinlerni deñiştire edik ve er sefer yañı variantnı profesional tercimege yibermege yetişalmadıq. Eger qırımtatar tilinde bir hata körseñiz — onı men, Dmıtro, yaptım! Lingvo Team ise er şeyni keyfiyetli, tez tercime etti ve atta söz saylavı aqqında suallerge cevap berdi.

Adlarını añmağa unutqanlarımızdan afu soraymız. Geym-cemge destek aqılalmaz edi, onıñ içün birilerini unutmaq pek qolay. «Sergüzeşt Saifesi» leyhasına inanğanıñız içün sağ oluñız!

Ukrayina MRO ve interaktiv edebiyat toplulıqlarınıñ diger tedbirlerinde körüşkençedek!